მედია

ახალი ამბები

თინათინ ბოკუჩავა: „ეს, ვითომ პოლიტპატიმარი კრიმინალები, რომლებიც ჩვენ იქ დაგვახვედრეს არ არის ქართველი ხალხი! ეს ზიზღი და ღვარძლი არ არის ქართველი ხალხი!“

საპარლამენტო უმცირესობის წევრი, ფრაქცია „ერთიანი ნაციონალური მოძრაობის“ წარმომადგენელი თინათინ ბოკუჩავა გუშინ ეროვნულ ბიბლიოთეკასთან განვითარებულ მოვლენებს გამოეხმაურა. მისი თქმით, შინაგან საქმეთა მინისტრი ნაცვლად იმისა, რომ მომხდარზე პასუხისმგებლობა აეღო ტყუის, როცა აცხადებს ალტერნატიული შესასვლელის არსებობის თაობაზე. „მინდა,  მივმართო ბატონ ბიძინა ივანიშვილსა და ქალბატონ თეა წულუკიანს, რომელსაც ასევე განსაკუთრებით უყვარს ხალხის სახელით საუბარი - ეს, ვითომ პოლიტპატიმარი კრიმინალები, რომლებიც ჩვენ იქ დაგვახვედრეს არ არის ქართველი ხალხი! ეს ზიზღი და ღვარძლი არ არის ქართველი ხალხი! შეიძლება, იქ ისეთი ადამიანებიც იყვნენ, რომლებსაც გულწრფელად უნდოდათ თავიანთი უკმაყოფილება მშვიდობიანად გამოეხატათ, რისი უფლებაც მათ, რა თქმა უნდა, აქვთ, მაგრამ მე მჯერა და მწამს, რომ ჩვენი ხალხი არის ბრძენი და შემწყნარებელი - რომც ვინმე თვლიდეს, წინა ხელისუფლებამ დაუშვა რაღაც შეცდომა ის, ამისთვის: ჩიორა თაქთაქიშვილს სახეში ხელს არ გაარტყამს, სერგო რატიანს წიხლებს არ დაუშენს, ზურაბ ჯაფარიძეს დანას არ მოუქნევს. ხომ უნდა დამთავრდეს ეს უბედურება? თუ მაინცდამაინც ისევ ის უნდა გავიმეოროთ, რაც ნანა კაკაბაძემ 90-იან წლებში გააკეთა, როცა მაშინაც, ვითომ პოლიტმატიმრები გამოუშვა ციხიდან, რომლებმაც გადაბუგეს და გააუბედურეს ეს ქვეყანა?“,  – განაცხადა თინათინ ბოკუჩავამ. მისივე თქმით, ქვეყანა დღეს წარსულში დაბრუნების რეალური საფრთხის წინაშე დგას. „მე დღითიდღე ვხედავ, რომ წარსულში დაბრუნების სლოგანი, რომელიც ჩვენს გუნდს ჰქონდა რაღაც წინასაარჩევნოდ მოგონილი სიტყვები კი არ იყო - ამისი რეალური საფრთხე გვიდგას. თუ წარსულში დაბრუნების სურვილი არა, მაშინ როგორ ხსნის თავის გამოსვლას უმრავლესობის ლიდერი ბატონი დავით საგანელიძე, რომელმაც გუშინ პრეზიდენტს მოუწოდა, რომ შევიდეს თავის სასახლეში და აღარ გამოვიდეს იქიდან, ანუ მას შინაპატიმრობა მიუსაჯა. ალბათ, ისიც უნდა, რომ სადმე ბუნკერში ჩავიდეს, უბრალოდ პრეზიდენტის სასახლეს ბუნკერი არ აქვს. მე მინდა, ვკითხო დღევანდელ ხელისუფლებას: ეს მხოლოდ საპარლამენტო უმრავლესობის ლიდერის, ბატონი დავით საგანელიძის პოზიციაა, თუ მთელი მთავრობის ოფიციალური პოზიციაა?'', – აღნიშნა საპარლამენტო უმცირესობის წევრმა.        

სერგო რატიანი: „ჩვენ ვითანამშრომლებთ გამოძიებასთან, რომ დავადგინოთ ვინ არის დამკვეთი - ამისთვის, ვიღაც უნდა დაისაჯოს!“

სერგო რატიანს გუშინ ეროვნულ ბიბლიოთეკასთან მომხდარ ფაქტზე დაკითხავენ. ამის შესახებ საპარლამენტო უმცირესობის წევრმა პარტიის ცენტრალურ ოფისში გამართულ პრესკონფერენციაზე განაცხადა. „ჩვენ მზად ვართ, ვითანამშრომლოთ გამოძიებასთან“, - ამბობს რატიანი. „ჩვენ არ გვაქვს პრეტენზია იმ ადამიანებთან, რომლებიც გუშინ იქ იყვნენ და ჩაიდინეს დანაშაული - ეს ადამიანები არიან მსხვერპლნი. ჩვენ პრეტენზია გვაქვს უშუალოდ დამკვეთებთან“, - განმარტავს იგი. მისი შეფასებით, ეს არის, დაახლოებით იგივე მოვლენები, როდესაც 90-იანი წლებში „მხედრიონი“ ჩადიოდა საშინელებებს. „ჩვენ ვითანამშრომლებთ გამოძიებასთან იმისთვის, რომ დავადგინოთ ვინ არის დამკვეთი -  ამისთვის, ვიღაც უნდა დაისაჯოს“, - აღნიშნა სერგო რატიანმა. ასევე მან ყურადღება გაამახვილა შინაგან საქმეთა მინისტრის განცხადებაზე, რომლის მიხედვით, ეროვნულ ბიბლიოთეკასთან იყო ალტერნატიული შესასვლელი. სერგო რატიანის თქმით, მას იქ არ უნახავს მსგავსი არაფერი და, ამასთან, არავის მიუწოდებია მისთვის ცნობა კორიდორის არსებობის თაობაზე.  

Pages